სახელმწიფო ,,ნალოქსონის" რეცეპტურას დაქვემდებარებული მედიკამენტების სიიდან ამოიღებას აპირებს. უახლოეს მომავალში მისი ყიდვა აფთიაქებში შესაძლებელია! ეს არის მნიშვნელოვანი სიახლე ზედოზირებით გარდაცვალების პრევენციისთვის. ეს არის შედეგი, რისთვისაც მრავალი წლის მანძილზე ვიბრძოდით ჩვენს პარტნიორ ორგანიზაციებთან ერთად!
ნარკანი იგივე ნალოქსონი - პრეპერატი ზედოზირების დროს გამოიყენება, რომელსაც რეალურად შეუძლია ადამიანის სიცოცხლის გადარჩენა. დღეს აფთიაქში ნალოქსონის შესაძენა ექიმის რეცეპტით არის შესაძლებელი, რაც ხშირ შემთხვევაში ნარკოტიკების მომხმარებლებს არ აქვთ და ზედოზირების შეთხვევაში ამის დრო არავის აქვს.
ნალოქსონი ჯანმოს მიერ შეტანილია სასიცოცხლო მნიშვნელობის სამკურნალო საშუალებების სიაში. შესაბამისად, საქართველოში ამ პრეპარატის შეტანა რეცეპტით გასაცემ პრეპარატთა სიაში,ზღუდავდა სასიცოცხლო მნიშვნელობის პრეპარატზე ხელმისაწვდომობას წლების განმავლობაში!
აღსანიშნავია, რომ „ზიანის შემცირების საქართველოს ქსელის“ წევრი ორგანიზაციები გლობალური ფონდის პროექტის ,,ნარკოტიკების ინექციური მომხმარებლებისთვის აივ პრევენციული სერვისების მიწოდება“ ფარგლებში ნალოქსონის დისტრიბუციას ნარკოტიკების მომხმარებელთა შორის 2009 წლიდან ახორციელებდა. მაშინ, როდესაც პირველი საპილოტე პროგრამა ,,წაიღე სახლში ნალოქსონი“ დაინერგა. ზიანის შემცირების ცენტრები ამ პრეპარატს უფასოდ, წელიწადში 15 ათას ამპულამდე გასცემენ საქართველოს მასშტაბით.
შეიძლება ითქვას, რომ ქვეყანაში მოქმედი ზიანის შემცირების პროგრამების მიერ წლების განმავლობაში ათასობით ადამიანის სიცოცხლე იქნა გადარჩენილი.
ზიანის შემცირების საქართველოს ქსელი მიესალმება ამ მნიშვნელოვან სიახლეს. იმედოვნებს, რომ სახელმწიფო აღნიშნულ საკითხს ბოლომდე მიიყვანს და ხელს შეუწყობს სააფთიაქო ქსელებში ამ მედიკამენტების ხელმისწვდომობას.
